Arquivo da categoría: Museos

Visita Fundación Penzol Xuño 2013

Queremos mostrar a crónica do que foi a Visita á Fundación Penzol realizada o pasado 29 de Xuño, organizada por ANABAD Galicia e acompañados por Alfonso Zulueta de Haz, presidente da Fundación, Francisco Domínguez, director da Biblioteca e María Dolores Cabrera Iglesias, vogal da Fundación.

A visita contou coa presentación da Fundación e da persoa a ela dedicada, Fermín Penzol, realizada polo seu presidente; seguida da mostra dos contidos, os fondos e as súas instalación realizada polo seu director.

Temos que sinalar que en días posteriores á nosa visita a Xunta de Galicia concedeu a Medalla de Ouro á Fundación Penzol, feito que contou coa nosa felicitación.

Reproducimos a continuación os textos de agradecemento e homenaxe de ANABAD Galicia realizados por Carmen Pérez Pais e Olimpia López Rodríguez.

Texto de Carmen Pérez Pais:

Bo día, e benvidos  en nome dos socios de Anabad en Vigo: 0 motivo desta xuntanza é celebrar e contribuír a celebrar dous acontecimentos que singularizan o presente ano  2013: a Conmemoración dos 50 anos da Fundación Penzol  e o centenario do nacemento de Francisco Fernández del Riego.

A Fundación Penzol representa un lugar privilexiado no imaxinario de arquiveiros e bibliotecarios: libros e documentos por descubrir, co engadido de ter pertencido e ter sido custodiados por ilustres persoeiros o por case anónimos cidadáns. Unha Fundación única e exemplar. Unha Fundación que ilustra o amor por Galicia e o seu patrimonio, dentro da xeneroxidade. Por iso, agrádanos achegarnos a súa sede e poder participar da súa riqueza.

Polo que se refire a Fernández del Riego, nunca agradeceremos bastante a súa contribución a ANABAD-Galicia, unha contribución desinteresada e respetuosa. Mentras foi presidente de ANABAD, entre 1990 e 1993 tivemos a sorte de contar co seu apoio e a súa forza. Nesta Casa  da Cultura, na súa casa de Praia América, e nun pequeno local da rúa México, tratamos os asuntos da Asociación. É unha faceta de Don Paco, -para María Jesús Soto e para mín, don Francisco-, pouco coñecida. Por iso, hoxe temos que aludir aquí ao seu apoio nas reivindicacións ante a Consellería, a súa consideración e confianza nas argumentacións expostas por nós, e ao exemplo de non escatimar esforzos, buscar saídas aos problemas e achegar posturas. Foi, e será sempre, unha grata e valiosa compañía. Mais que celebrar o centenario, recordemos quen foi don Paco e sintamos a súa presenza.

Francisco Fernández del Riego, desfrutará hoxe sabendo que de novo ten unha visita de ANABAD.

E sendo certo que seguimos falando case dos memos problemas de  fai vinte anos. Estar aquí, neste edificio,  admirar as coleccións reunidas, e organizadas,  comprender todo o traballo e esforzo que aquí se esconde é unha lección e unha sorte. Por iso, ANABAD e todos nós, temos que dar as grazas á Fundación Penzol e a Fernández del Riego. Grazas!

Texto de Olimpia López Rodríguez:

Para a nosa asociación hoxe é un día de celebración, de reencontro e de recoñecemento a D. Francisco Fernández del Riego. Na primavera de 1990 escollimos presidente de ANABAD Galicia a Don Paco, 23 anos despois estamos en Vigo, na súa cidade de adopción, na Fundación Penzol na que dirixiu a súa biblioteca durante moitos anos, estamos pois na súa casa celebrando o centenario do seu nacemento.

Naquela primavera implicouse na defensa dos profesionais dos arquivos, bibliotecas e museos e do patrimonio cultural. A Asociación tiña apenas sete anos e D. Paco asumiu o labor de seguir a consolidar o traballo xa iniciado por Pedro López. Vigo foi a sede e acompañado por Carmen Pérez Pais, María Jesús Soto, Félix de la Fuente, Luis Martínez e Tomás Fernández comezaron unha tarefa inxente naqueles tempos en que a nosa Comunidade Autónoma acababa de recibir a transferencia da xestión dos que eran os grandes centros custodios do patrimonio: os arquivos, bibliotecas e museos de titularidade estatal. Comezaba unha nova etapa.

Baixo o seu mandato ANABAD :

  • Presentou alegacións á convocatoria das primeiras oposicións convocadas pola Xunta de Galicia das escalas de arquivos, bibliotecas e museos
  • Elaborou o Directorio de Arquivo, Bibliotecas e Museos de Galicia baixo a dirección de Pedro López e Carlos G. Guitián
  • Impulsou o convenio entre a Consellería de Cultura e a propia Asociación para a elaboración do censo de arquivos privados depositados nos pazos de Galicia
  • Organizou cursos propios e en colaboración coas institucións de Galicia
  • Elaborou un informe sobre a situación bibliotecaria en Vigo, e moitas outras actividades que non imos relatar unha a unha.

Nesta liña seguimos a traballar como el, na formación dos profesionais, na colaboración coas institucións, na defensa das nosas profesións e dos profesionais. 23 anos despois necesitamos da Asociación, e de persoas que como Don Paco entenderon e defenderon que a dedicación, a colaboración, a defensa do común, do grupo, son necesarias, imprescindibles, agora tamén, para construír un futuro mellor. Desde ANABAD Galicia queremos agradecer a súa entrega á nosa asociación, o seu paso por ANABAD foi unha etapa máis nunha vida dedicada á consolidación dun pais.

Tamén queremos agradecer as atencións da Fundación, hoxe representada polo seu presidente Alfonso Zulueta e polo seu director Francisco Domínguez, e non queremos perder ademais a oportunidade de comunicarlles que ANABAD Galicia ten solicitado a concesión da Medalla de Ouro da Xunta de Galicia para a Fundación Penzol no seu 50 aniversario.

Moitas Grazas

Fotografías da celebración (preme nas imaxes para visitar a galería)

Fundación Penzol:

OLYMPUS DIGITAL CAMERA

Comida de Confraternización:

OLYMPUS DIGITAL CAMERA

Visita ao Museo de Arte Contemporánea de Vigo (Marco):

OLYMPUS DIGITAL CAMERA

Curso básico TIC para traballadores dos Servizos de Información

ticTítulo: Curso básico TIC para traballadores dos Servizos de Información

Datas  e  duración: 8 de xuño do 2013

Edición: presencial, Aula de Informática do Centro Sociocultural das Fontiñas Rúa de Berlín 13 (Fontiñas) 15707 Santiago de Compostela.

Docente: Joaquín Cores Otero, Informático e Bibliotecario.

Prazas: 20 prazas

Matrícula: gratuíta para socios de ANABAD Galicia. Matrícula para non socios: 30€

Máis Información

Día Internacional dos Museos 2013

O 18 de Maio celébrase esta desde que en 1977 o ICOM (Consello Internacional dos Museos) acordou dedicar aos Museos. Este ano o lema será: Museos (memoria + creatividade) = progreso social

 museos_banner

Algunhas actividades nos Museos galegos (en construción):

Pódense seguir as actividades a través do twitter co hashtag #DIM13

O Museo da Fundación Pública Galega Camilo José Cela, en Padrón, celebra o ‘Letreseo

Seis centros de referencia en Santiago celebran o Día Internacional dos Museos cunha ampla programación que se pode seguir a través da páxina do Facebook DIM13-Compostela

O Museo Arqueolóxico Provincial de Ourense ten unha ampla programación. Ademais realizaron dous vídeos promocionais para a difusión desta data:

DIM2013

Museo Massó: actividades de clebración do Día dos Museos durante o mes de Maio

Museo de Arte Contemporánea (MAC Coruña), programa do sábado 11 de maio:

  • 12h. Actividade en familia: Cantacontos con Mato Armada e Raquel Galavís
  • 17,30h. Actividade en familia: Tetris analóxico Codeco con Belén Montero e Juan Lesta
  • 20h. Para todos os públicos: Sesións de DJ e VideoDJ

Museo de Belas Artes da Coruña: Actividades do Día Internacional dos Museos e Noite dos Museos: O Museo da Memoria para nenos e nenas; Os retratos portadores da Memoria; Museo musical e Jazz no Museo…

Museo de Pontevedra: varias actividades para nenos e adultos: Paseo pola arte galega desde o s. XIV a Castelao; Obradoiro infantil de expresión artística; O segredo dos Dinís e o Xogo do seis…

Accede ao portal dos Museos de Galicia para ver a programación de cada un deles.

Os Museos estatais realizan xornadas de portas abertas, amplían os horarios de apertura e realizarán unha ampla programación cultural.